Teherani është zgjuar sot mes frikës dhe panikut, pas disa shpërthimeve të fuqishme që kanë tronditur kryeqytetin iranian. Mediat ndërkombëtare raportojnë se këto shpërthime janë pasojë e një sulmi ajror masiv nga forcat izraelite, të cilat kanë goditur të paktën 15 objektiva të dyshuara ushtarake.
Izraeli e ka cilësuar këtë ofensivë si një veprim “parandalues”, duke theksuar se sulmet kishin për qëllim ndalimin e kërcënimeve të afërta nga territori iranian. Ndërkohë, autoritetet iraniane nuk kanë bërë ende një deklaratë zyrtare, por në rrugët e Teheranit janë ngritur forcat e sigurisë dhe është vendosur gjendje gatishmërie e lartë.
Ajo që e bën situatën edhe më të tensionuar është fakti se, sipas burimeve të CNN, operacioni nuk është koordinuar me Shtetet e Bashkuara, duke rritur pasigurinë për pasojat që mund të ndjekin në shkallë globale.
Në Uashington, presidenti amerikan Donald Trump ka thirrur një mbledhje urgjente me Këshillin e Sigurisë Kombëtare në Shtëpinë e Bardhë, për të diskutuar situatën dhe për të marrë masa për përshkallëzimin e mundshëm të konfliktit në Lindjen e Mesme.
Ekspertët ndërkombëtarë paralajmërojnë se çdo kundërpërgjigje nga Irani mund të çojë në një përplasje të hapur rajonale – apo edhe globale.